حبايبي الطلاب.. السلام عليكم ورحمة الله وبركاته
مع أول يوم في امتحانات الثانوية العامة في مصر، النهاردة الأحد ٢١/٦/٢٠٢٦، عاوز أقولكم نصيحتين من القلب:
🎓 أولاً: رسالة للطلاب
بلاش التوتر والقلق، مفيش داعي للهم. اعتبروا اليوم "بروفة"، الموضوع سهل (التربية الوطنية - التربية الدينية). دي مواد مش محتاجة أصلاً شرح، لو إحنا مركزين هنلاقي نفسنا فاهمين. اطمنوا، وخلي دايماً عندكم يقين في ربنا إنها هتعدي على خير.
👩👧👦 ثانياً: رسالة لست الكل (أم الطالب)
أوعي تقلقي وتنقلي قلقك لعيالك، دي أكبر غلطة بتقعي فيها. خليكي شاطرة وأستاذة، فرفشي وخلي العيال تحس إنه يوم مهم لكن عادي ومفيهوش حاجة تخوف.
- شجعيهم على الصلاة والدعاء والمراجعة بشكل لطيف.
- بلاش الشبشب والحزام و"افتح الكتاب يا زفت" و"احفظي يا هبابة".. عدي الليلة وزوقيها معاهم، الله يصلح حالك.
- متنسيش تدي عيالك: إزازة مياة فيها تلج، ساعة يد عشان الوقت، ومسطرة عشان البابل شيت.
- ولما اليوم يخلص، بلاش أسئلة كتير. كفاية سؤال بهدوء: "عملتوا إيه؟"، ومهما كان الرد نقول "الحمد لله كله خير" ونركز في اللي جاي.
📝 نصائح أخيرة في اللجنة
وأنت يا طالب (أنتِ وهي)، خف الموبايل شوية، كلها أيام وهتزهق منه، استغل وقتك.
تعالى يا طالب منك ليها، نسيت أقولك: بلاش تتوتر في اللجنة من المراقبين حتى لو وقف فوق راسك! سيبه براحته، ما أنت مش معاك حاجة غلط تتحاسب عليها، فإهدى كده وخليك مبتسم، خلي المراقب يشك فيك من الفرحة والهدوء.
في النهاية، ربنا معاكم ويصلح حالكم، وهتابعكم أول بأول!
هنزلكم كمان النتيجة أول ما تظهر، بس تابعونا على صفحاتنا لمعرفة نتيجة الثانوية العامة ٢٠٢٦ فور ظهورها مباشرة إن شاء الله، عشان تدعوا لعمكم قلايط ونشرب الشربات 🎉