صوص باربيكيو أمريكي أصلي
(Original BBQ Sauce - Kansas City Style)
اتعلمي مع الشيف قلايط يا ست الكل طريقة عمايل صوص الباربيكيو الاصلي بتاع امريكا هقدمهولك النهارده بيور كانك قاعده في قلب نيوورك وبتشوي حتة ستيك في حديقة مفتوح هناك وهتدعيلي اغلب الوصفات المنتشره افتكاسات واختراعات خدي من عمك قلايط الخلاصة والخبرة وهتدعيلي وعيالك وجوزك هيدعولك تقومي تدعيلي تاني اهم شئ خليكي عارفه الطريقة او الوصفة دي بدون إضافات غريبة أو "افتكاسات"، فدي من أقرب الوصفات للطعم الأصلي
يلا نبدا بسم الله
مكونات عمل صوص الباربيكيو الاصلي-
2 كوب كاتشب سادة
½ كوب خل تفاح
¼ كوب سكر بني
2 ملعقة كبيرة مولاس (دبس السكر الأسود) – ده من أسرار الطعم الأصلي
1 ملعقة كبيرة صوص ورشستر
1 ملعقة كبيرة بابريكا
1 ملعقة صغيرة بابريكا مدخنة (اختياري لكن قريب جدًا من التجاري)
1 ملعقة صغيرة بودرة ثوم
1 ملعقة صغيرة بودرة بصل
½ ملعقة صغيرة فلفل أسود
½ ملعقة صغيرة ملح
½ ملعقة بابريكا مدخنة ( اختياري بس حلوه بصراحه اعمليها )
رشة بسيطة شطة أو كايين (اختياري)
عارف السؤال اللي في بالك دلوقتي والاحباط اللي جالك وبتسالي نفسك
هو ايه المولاس
طيب ايه الشورسييستر صوص ده
وخل التفاح خلصان وغالي
والسكر البني ده اجيبه منين انا اعرف الابيض بتاعنا يا عم قلايط
هقولك متقلقيش عندي البدايل وهتدينا نفس النتيجة بس انا كتبتها بالتركات الصح اذ ربما متوفرة المكونات عند حد وينفذ عليها خدي يا ستي
اولا بديل خل التفاح ( ½ كوباية خل أبيض + معلقة صغيرة عصير ليمون كبديل قريب )
ثانيا بديل السكر البني ( تلات معالق كبيرة سكر أبيض + معلقة كبيرة عسل أسود بتاعنا العادي )
ثالثا بديل صوص الورشستر ( معلقة كبيرة صويا صوص + معلقة صغيرة خل + رشة سكر )
رابعا بديل المولاس ( المولاس هو العسل الاسود يا ست الكل ولا تتعبي روحك عسل قصب السكر )
ندخل عالطريقة بعد ما عرفنا المكونات والبدايل بتاعت بعضها اللي صعب توفره عند اغلبنا
بسم الله حطي المكونات في حله وقلبيها كويس وارفعيها عالنار وقلبي والنار تكون وسط لا عاليه ولا واطيه واول ما تغلي وطي النار وسيبيها عالنار من تلت لنص ساعه وكل دقيقتين كده قلبي دقيقه ولا حاجه لحد ما تلاقي قوامه تقل هوب اطفي عليه .
علي ما يبرد ويهدي شوية نكون مجهزين برطمان معقمينه كويس وده يا ست الناس تعقمية بمياه مغلية هو وغطاه وتنشفيه كويس بمناديل معقمه نضيفه يعني وصبي الصوص فيه ويبرد دخلية التلاجه ليلة كاملة وبعدها بالهنا
طيب يا شيف قلايط هيعيش قد ايه
لو برطمانك معقم يعيش شهر وزياده ولما تاخدي منه تكون بمعلقه نضيفه ومش مبلوله ومتنسيش ده طبيعي فمفيهوش مواد حافظه زي الجاهز لو قعد سنة تحت السرير مش هيبوظ
وفى فيديو على صفحتنا عالفيس
وبالهنا والشفا
اسعدتوني بحضوركم سواء هنا في المدونه او في صفحتنا عالفيسبوك وانستجرام
تحياتي
مستر قلايط